2 Macc 7

Nohno men oh Nah Pwutak kei Kamakamkihla Ar Pwoson

1Pil ehu ahnsou, pirien en pwutak isimen iangahki ar nohno ahpw selidi. Nanmwarkio ketin ruwese re en wowoki oh idihdohng re en kang uduk en pwihk. ^a 2Eri, emen pwutak ko ahpw nda, “Dahme komw kupwukuwpure me komw pahn alehdi ni omwi wiahiong kiht met? Pwe at mehla mwahu sang at pahn kesehla tiahk en at pahpa kahlap ako.”

3Nanmwarkio inenen engiengkihda kowahlap en pwutak eh pato, e ahpw mahsanih pwe ekei einpwoat oh ketel kalaimwun en kodahng pohn kisiniei lao karakar douluhl, 4irail ahpw mwadangete kapwaiada. Ih eri mahsanihong emen sapwellime ohl ko en lupukasang lowen pwutak me lokaiao oh en rerehsang kilin moangeo oh lupukasang kumwut en peh kan oh pateh neh kan, nindokon eh nohno oh rie ko ar kilikilang. 5Mwurin pwutako eh ohlahr douluhl ahpw wie esiesingekte, nanmwarkio ahpw mahsanih en wisikla oh lekdekdiong nan ehu einpwoat ko. Ni ediniei eh kusdahsang nan einpwoato, pirieno oh ar nohno ahpw kakehlaka nan kapehd en emenemen pwe re en mehkihla ar pwoson; re nda, 6“Kaun-o Koht ketin mahmahsanih kitail oh ketin kupwure atail lokolok. Moses kadehdedahr met ni eh ntingihedi koul ehu me keriahla irail kan me kin kesehla Kaun-o; e koasoia, ‘Kaun-o pahn ketin kupwurkalahngan ong irail kan me kin papah.’” ^b

7Mwurin meseniho eh wia soangen kamakamala wet, sounpei ko ahpw tapihada pereperenki pwutak keriemeno, ni ar wie rerrere kilin moangeo. Re ahpw idek reh, “Eri, ke pahn kang uduk en pwihket de se en pil lupukasang kumwut en pehmw kan oh nehmw kan?”

8E ahpw sapeng irail ni mahsen en seme kahlap ako, “I sohte mwahn pahn kang!” Sounpei ko eri kaloke, duwehte ar kaloke meteio, 9Ni pwutako eh pahn melahr, e ahpw werkilahng nanmwarkio, “Sounkam aramas emen komwi! Komw kak kemeikitala, ahpw Nanmwarkien wehi pokon pahn ketin komourkitala oh ketikihong kiht mour soutuk, pwehki at peikiong sapwellime kosonned kan.”

10Sounpei ko ahpw pil tapihada pereperenki ar kalokaloke pwutak kesilimeno. Ni ar ruwese en kapwadei lowe, e mwadangete kapwadei. Ih eri kapahla peh ko ni kapehd kehlail 11oh kommwad ni eh nda, “Koht me ketikihong ie pehi kat, ahpw I kesempwalki sapwellime kosonned kan sang pehi kat, oh I koapworopworki me Koht pahn pwurehng kapwuredohng ie pehi kat.” 12Nanmwarkio oh irail ko me ieiang ih ahpw pwuriamweikihla eh nan kapehd kehlail oh eh ineng en ale lokolok.

13Mwurin eh mehla, sounpei ko pil kaloke kapahmeno ni soangen kalokolokohte; 14ahpw iet me e koasoia mwohn eh mehla, “I perenki ei pahn mehla nin limomwien, pwe se koapworopworki me Koht pahn ketin komourkitada. Ahpw komwi Antaiokus, sohte pahn iang iasadahng mour!”

15Ni sounpei ko ar ale pwutak kelimeno oh tapihada kaloke, 16e ahpw sohpeiong nanmwarkio kilikilang oh nda, “Komwi sapwellimaniki manaman en wia dahme komw kupwurki, mehnda ma pil komwi aramas emen me pahn mehla. Ahpw komw dehpa kupwukupwure me Koht likidmelielahr at aramas akan. 17Komw awihete, pwe Koht pahn ketin doadoahngki sapwellime manaman lap pwe en ketin kalokei komwi oh kadaudokomwi kan.”

18Sounpei ko eri pil ale pwutak kewenemeno, oh mwohn eh pahn mehla e nda, “Komw dehr pitih pein komwi. Se ale lokolok duwen me konehng, pwehki at wiadahr dihp ong at Koht. Ih kahrepen soahng suwed pwukat eh wiawihong kiht. 19Ahpw komwi dehpa kupwukupwure me komwi pahn pitsang kalokolok en Koht pwehki omwi uhwong.”

20Ar nohno me keieu kapwuriamwei sang irail koaros, oh e warohng en mie katamanpe loalatail. Mehnda ma eh kilang nah pwutak ko ar mehla rahnteieu, ahpw e kanengamahiong ni kapehd kehlail pwehki eh likih Kaun-o. 21Ni kapehd limpoak en lih iangahki kommwad en ohl, e wia koasoi en kakehlaka nah pwutak ko ni mahsen en samarail kahlap ako, nda, 22“I sohte ese ia duwen amwail mour eh tepida nan kapehdiet. Kaidehn ngehi me kihong kumwail mour oh esingek oh kakonepene paliwaramwail kan. 23Iei Koht me ketin wiahda mepwukat, ih me ketin kapikada nanleng oh sampah, keinek kan, oh mehkoaros me mie. Ih me kupwurkalahngan oh e pahn pwurehng ketikihong kumwail mour oh esingek, pwehki amwail poakohng eh kosonned akan laudsang amwail poakohng paliwaramwail kan.”

24Antaiokus inenen wehwehki me liho kasakasarowe, eri, e ahpw nantihong pwutak tikitiko en kesehla tiahk en seme kahlap ako. E inoukihong pwutako me e pahn kepwehpwehla oh ndandla, oh e pahn kasapwiladahng nan dehu ile oh ketikihong lengileng en “Kompoakepahn Nanmwarki.” 25Ahpw pwutako sohte mwahn katele nanmwarkio, Antaiokus eri song en koangngoangehki ineo en panawih pwe en dehr kamakamala, 26oh mwurin eh wie ngidingidiong liho, liho ahpw pwungkihda me e pahn koasoiong pwutako. 27Liho eri keilahng mpen nah pwutako, ahpw e pitihedi ohl lemeio ni eh ndahng naho ni pein ar lokaia, “Samwa, menlau kilengdohng ie. Tamataman me ke mihmihki nan kapehdiet erein sounpwong duwau oh I kadihdihiuk sounpar siluh. I apwahpwalihiuk oh tetehk omw anahn akan lao lel rahnwet. 28Samwa, I peki rehmw, ke en saradahng nanleng, oh kilang sampah oh audepe kan koaros; oh tamataman me Koht me ketin kapikada mehkoaros sang sohte, duwehte eh pil ketin kapikada aramas koaros. 29Ke dehr masak sounkam aramas menet. Mweidala omw mour oh kadehdehda me ke warohng iang riomw ko, pwe sang ni kupwurkalahngan en Koht I en kak tuhwong kowe oh riomw ko ni rahnen iasadao.”

30Ni liho eh saikinte kaimwisekala eh koasoi, pwutako ahpw nda, “Maing Nanmwarki Antaiokus, dahme komw awiawih? I sohte pahn kapwaiada sapwellimomwi mahsen kan. Ihte Kosonned me Moses patohwanohng samat kahlap ako me I pahn peikiong. 31Komwi kupwuredahr soangen tiahk lemei tohto me komwi pahn kalokehki at aramas akan, ahpw komwi sohte pahn pitsang sapwellimen Koht kalokolok me e ketin nekinekidohng komwi. 32Mehlel pwoat me at Koht ieiaso ketin engieng paht oh ketin kalokalokei kiht pwehki dipat akan, pwehn ketin kapwungkitala oh kaweid kiht. Ahpw met pahn wiawihte ahnsou kis, pwe se wiewiahte sapwellime ladu, oh e pahn ketin kupwur mahkohng kiht. 34Ahpw komwi me keieu lemei oh keieu kasaut nin sampah. Eri, komw dehr pitiheki pein komwi dene komw me lapalap ni omwi kalokaloke sapwellimen Koht aramas akan. 35Sohte mehkot komwi kak wia pwe komwi en pitsang kalokolok sang nin limen Wasa Lapalahpie oh me ketin mwahngih mehkoaros. 36Riei ko lokolongki ahnsou mwotomwot pwehki at loalopwoatohng sapwellimen Koht inowo, ahpw met re aleier mour soutuk. Ahpw komwi, komw pahn mihla pahn sapwellimen Koht kadeik oh kalokolok nin duwen me konehng omwi aklapalap. 37Eri met, I pahn mweidala ei mour oh paliwereiet ong kosonned kan en samat kahlap ako, duwehte me riei ko wiahier. Oh I pil peki Koht en ketin kupwurehla sapwellime aramas akan ni ahnsou mwadang oh en ketin kaloke komwi lao komwi pohnesehla me ihete me Koht. 38Koht en ketin kupwure pwe ngehi oh riei ko me en kaimwisekala engieng en Koht Wasa Lapalahpie me e ketikidohng pohn at wehi unsek ni kupwur pwung.”

39Koasoi en kamwamwahl pwukat ahpw kahngiangihada kowahlap nanmwarkio, kahrehda e mahsanih pwe pwutak tikitiko en ale kalokolok me laudsang en rie ko. 40Eri, pwutako mehla, ni eh likih unsek Kaun-o, sohte mwahn soaloalopwoatala ahnsou kis.

41Liho kamakamala keieu mwuhr.

42Eri, ahnsou wet e itarehr ei koasoia duwen lokolok oh idihd en kang mwasahl en mahn meirongala ako me wiawihong mehn Suhs ako.